ବାଣପୁର (ଆମ ଅଧିକାର ) ଖୋର୍ଦ୍ଧା ଜିଲ୍ଲା ବାଣପୁର ସହରରେ ଦିନକୁ ଦିନ ବଢ଼ିଚାଲିଛି ଅମାନିଆ ବୁଲେଟ ଚାଳକଙ୍କ ଦୌରାତ୍ମ୍ୟ। ସହରର ବିଭିନ୍ନ ରାସ୍ତାରେ କିଛି ବୁଲେଟ ଚାଳକ ଦ୍ରୁତ ଗତିରେ ଗାଡ଼ି ଚଳାଇବା ସହିତ ଅନେକ ସମୟରେ ଅତ୍ୟଧିକ ଶବ୍ଦ କରୁଥିବା ନେଇ ସାଧାରଣ ଲୋକଙ୍କ ମଧ୍ୟରେ ଅସନ୍ତୋଷ ଦେଖାଦେଉଛି।
ବିଶେଷକରି ବଜାର ଅଞ୍ଚଳ ଓ ଜନଗହଳିପୂର୍ଣ୍ଣ ରାସ୍ତାରେ ଏଭଳି ଅମାନିଆ ଚାଳନା ଯୋଗୁଁ ପଥଚାରୀ, ବୃଦ୍ଧବୃଦ୍ଧା ଏବଂ ଛୋଟ ପିଲାମାନେ ଭୟଭୀତ ହେଉଥିବା ଅଭିଯୋଗ ହେଉଛି। ହଠାତ୍ ଜୋରରେ ହର୍ଣ୍ଣ କିମ୍ବା ବୁଲେଟର ଅଧିକ ଶବ୍ଦ ଲୋକଙ୍କୁ ଅସୁବିଧାରେ ପକାଉଛି।
ଏପରିକି କିଛି ଚାଳକ ଟ୍ରାଫିକ ନିୟମକୁ ଅଣଦେଖା କରି ଦ୍ରୁତ ଗତିରେ ଯାତାୟାତ କରୁଥିବା ନେଇ ମଧ୍ୟ ପ୍ରଶ୍ନ ଉଠୁଛି। ଏଭଳି ପରିସ୍ଥିତିରେ ବାଣପୁର ପୋଲିସ ଓ ସମ୍ପୃକ୍ତ ବିଭାଗ ପକ୍ଷରୁ ନିୟମିତ ଯାଞ୍ଚ ଏବଂ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ହେବା ଆବଶ୍ୟକ ବୋଲି ସାଧାରଣରେ ଦାବି ହେଉଛି।
ତେବେ ପ୍ରଶ୍ନ ଉଠୁଛି—ବାଣପୁର ସହରରେ ଏଭଳି ଅମାନିଆ ବୁଲେଟ ଚାଳକଙ୍କ ଉପରେ କେବେ ଲାଗିବ ଅଙ୍କୁଶ? ଟ୍ରାଫିକ ନିୟମକୁ ଉଲ୍ଲଂଘନ କରୁଥିବା ଚାଳକଙ୍କ ବିରୋଧରେ କେବେ ହେବ କଡ଼ା ଯାଞ୍ଚ ଓ ଆଇନଗତ କାର୍ଯ୍ୟାନୁଷ୍ଠାନ? ଏବେ ସମସ୍ତଙ୍କ ନଜର ସମ୍ପୃକ୍ତ ପ୍ରଶାସନ ଉପରେ।
